Butera Sandrine Isheja yahawe ikaze n’Ubuyobozi bukuru bwa RBA
Kuri uyu wa Kabiri, Ubuyobozi bukuru bw’Urwego rw’Igihugu rw’Itangazamakuru (RBA) bwahaye ikaze Butera Sandrine Isheja , Umuyobozi Mukuru Wungirije, uherutse gushyirwa kuri uyu mwanya n’Inama y’Abaminisitiri, bumwizeza imikoranire inoze mu nshingano nshya.
Sandrine Isheja Butera wari usanzwe ari umunyamakuru kuri Radio Kiss FM, yagizwe Umuyobozi Mukuru Wungirije w’Ikigo cy’Igihugu cy’Itangazamakuru, RBA.Isheja Butera yari asanzwe ayobora radiyo ya Kiss FM, akaba agiye kungiriza Cléophas Barore ku buyobozi bw’Ikigo cy’Igihugu cy’Itangazamakuru (RBA).
Sandrine w’imyaka 35 y’amavuko, ni umunyamakuru, Umuhuza mu bitaramo, ‘MC, Umukangurambaga, ‘Motivational Speaker’, Umutwazi w’Imodoka zo mu masiganwa ndetse akaba afite Impamyabumenyi y’Icyiciro cya gatatu cya Kaminuza mu byijyane n’Uburinganire, Umuco n’Iterambere.
Iyi nama y’Abaminisitiri yateranye kuri uyu wa Gatanu tariki 23 Kanama 2024, yavanye kandi ku mirimo Zephanie Niyonkuru wari Umunyamabanga Uhoraho muri Minisiteri ya Siporo (MINISPORTS).
Zephanie Niyonkuru muri Mutarama 2023 nibwo yagizwe Umunyamabanga Uhoraho muri Minisiteri ya Siporo asimbuye Shema Maboko Didier wari wahagaritswe na Perezida Paul Kagame muri Nzeri 2022.
Inama y’Abaminisitiri yo kuri uyu wa Gatanu ikozwe ku nshuro ya mbere muri iyi Manda nshya y’imyaka itanu ya Perezida Kagame, ikaba yanemeje gahunda ya Guverinoma (NST2). Hafashwe kandi ingamba zo kwirinda ubushita bw’inkende (monkey pox).