Ikipe ya Arsenal iri hafi kurangiza igikorwa cyo gusinyisha rutahizamu w’Umusuwede, Viktor Gyökeres, ukinira Sporting CP yo muri Portugal, nyuma y’uko ibiganiro hagati y’impande zombi byatinzeho gato kubera ibijyanye n’amafaranga y’inyongera (add-ons).
Nk’uko BBC Sport yabitangaje, amakuru y’ibanze y’iyi transfert agaragaza ko Arsenal yemeye gutanga miliyoni 73.5 z’ama-euro (£63.5m). Byari biteganyijwe ko uyu mukinnyi yaba yamaze kugera muri Arsenal mbere y’uko bajya mu rugendo rw’imyitozo yo muri Aziya rwatangiye ku Cyumweru.
Gyökeres w’imyaka 27 amaze kwemera amasezerano y’imyaka itanu muri Arsenal. Uyu rutahizamu yahize abandi benshi ku isoko ryo kugura abakinnyi, nyuma yo gutsindira Sporting ibitego 54 mu mikino 52 gusa mu mwaka ushize. Mbere y’aho, yitwaye neza muri Coventry City aho yatsinze ibitego 43 mu mikino 116, akanatorwa mu ikipe y’umwaka ya Championship 2022-2023.
Arsenal yahinduye icyerekezo ijya kuri Gyökeres nyuma yo kunanirwa kugera ku masezerano na Benjamin Sesko wa RB Leipzig. Umutoza Mikel Arteta yifuza cyane kongerera ubukana ubusatirizi bwe nyuma y’uko ikipe ye itsinze ibitego 17 munsi ya Liverpool mu mwaka w’imikino ushize.
Gyökeres, wahoze akinira Brighton, amaze gukinira ikipe y’igihugu ya Suwede imikino 26, atsinda ibitego 15, akaba yarayikiniye bwa mbere mu 2019.
Ivomo : BBC Sports na Telegraph .
