Bukayo Saka yaciye agahigo kadasanzwe muri Arsenal nubwo yagize ikibazo cy’imvune
Ku gicamunsi cyo kuri uyu wa Gatandatu nibwo Bukayo Saka ukomoka mu Bwongereza, yujuje imikino 250 yakiniye ikipe ya Arsenal muri shampiyona y’ikiciro cya mbere mu Bwongereza.
Bukayo Saka yakinnye umukino wa 250 mu ikipe ya Arsenal, ni mu mukino ikipe ye ya Arsenal yasuyemo ikipe ya Crystal Palace ku kibuga Selhurst Park ndetse iza no kubona intsinzi ya 1-5.
Uyu musore w’imyaka 23 abaye uwa Gatatu mu bato bageze kuri ibi bigwi mu mateka ya Arsenal ndetse akaba amaze gutsinda ibitego 67 agatanga n’imipira 64 kuva yatangira gukinira iyi kipe byemewe n’amategeko mu gushyingo 2018.
Saka ari mu bahagaze neza muri iki gihe dore ko amaze kugira uruhare rw’ibitego 15, mu nshuro 15, yitabiriye mu gihe imipira 10 yavuyemo ibitego amaze gutanga nta mukinnyi n’umwe wari wabigeraho.
Bukayo Saka wazamutse muri Arsenal aturutse mu makipe y’abato yayo ku myaka 8, amaze kuba umukinnyi ntakuka haba mu ikipe y’igihugu ndetse no muri Arsenal.
Bukayo Saka amaze gutwara ibihembo by’umukinnyi witwaye neza mu ikipe ya Arsenal inshuro ebyiri muri 2021 na 2022 akaba Kandi afite n’ibihembo 2 nk’uwitwaye neza mu ikipe y’igihugu 2022 na 2023, mu gihe ari we watsindiye igihembo cy’umukinnyi muto mwiza mu gihugu cy’Ubwongereza 2022-2023 nyuma yo kubasha gutsinda ibitego 14 ndetse agatanga n’imipira 11 yabivuyemo.
Saka yabashije gutwara igikombe cy’igihugu ‘FA cup’ mu ikipe ya Arsenal, ndetse ari muri squad z’ikipe y’Abongereza zageze ku mikino y’anyuma y’igikombe cy’Uburayi mu 2021 no mu 2024.