Premier League: Arsenal nyuma y’imikino ine idatsinda yongeye kubona amanota atatu imbumbe
Ikipe ya Arsenal ku munsi wa 12 w’ashampiyona y’igihugu y’Abongereza “Premier League” yitwaye neza batsinda ikipe ya Nottingham Forest F.C. ibitego bitatu ku busa(3-0) nyuma y’imikino ine itatsinda.
Ni umukino ikipe ya Arsenal yagiye gukina imaze imikino ine idatsinda yikurikiranya muri shampiyona aho mbere na mbere batsinzwe n’ikipe ya A.F.C. Bournemouth ibitego bibiri ku busa(2-0) icyo gihe babonye n’ikarita y’umutuku ya William Saliba, banganya n’ikipe ya Liverpool igitego kimwe kuri kimwe(1-1), batsindwa na Newcastle United F.C. igitego kimwe ku busa(1-0) ndetse banganya na Chelsea kimwe kuri kimwe(1-1).
Benshi bibazaga niba hari ikiri buhinduke nyuma y’akaruhuko mpuzamahanga , n’igaruka ry’abakinnyi beza ba Arsenal bari barasaritswe n’imvune dore ko Nottingham Forest F.C. yari imaze iminsi yitwara neza ndetse hakaba hari ikikango cyuko yatsinze Liverpool ku kibuga cyayo igitego kimwe ku busa(1-0) bituma iyi kipe y’umutoza Arne Slot ibura amanota atatu.
Ntibyatinze kubera ko Arsenal yabonye igitego cya mbere ku munota wa 15′ w’umukino cya Bukayo Saka ku mupira yarahawe na Martin Ødegaard kapiteni wa Arsenal nawe anyura muri bamyugariro nk’umurabyo atera ishoti riremereye yandikisha igitego cya mbere.
Igice cya mbere cy’umukino cyarangiye ari kimwe cya Arsenal ku busa bwa Nottingham Forest F.C, mu gice cya kabiri Arsenal yakomeje kwatakana imbara maze ku munota wa 52′ w’umukino Thomas Partey wari ujemo asimbuye Jorginho yatsinze igitego cya kabiri ku ishoti riremereye yateye mu izamu ku mupira yarahawe na Bukayo Saka.
Umunya-Esipanye Mikel Arteta yakomeje gukora impinduka byanatumye Ethan Nwaneri yinjiramo asimbuye Martin Ødegaard ndetse anatsinda igitego ku munota wa 86′ ku mupira yahawe na Raheem Sterling kiba n’igitego cye cya mbere yari atsinze muri Premier League.
Byarangiye Arteta acyuye amanota atatu y’umunsi ku bitego bitatu ku busa(3-0) byatumye yuzuza amanota 22 ku mwanya wa kane, mu gihe Nottingham Forest F.C yo yagumye ku manota 19 ku mwanya wa 6 byagateganyo.