Abantu 30 bamaze gupfira mu myigaragambyo yakuriye amatora muri Mozambique : Human Rights Watch
Umuryango mpuzamahanga uharanira uburenganzira bwa muntu [ Human Rights Watch (HRW)] watangaje ko byibuze abantu bagera kuri 30 bamaze kwicirwa mu gihe cy’ibyumweru hafi bitatu byo guhashya imyigaragambyo yadutse nyuma y’amatora ya perezida atavugwaho rumwe mu gihugu cya Mozambike .
Umuryango uharanira uburenganzira bwa muntu ukorera i New York wabwiye ibiro ntaramakuru by’abafaransa AFP ko nibura aba abantu 30 bishwe hagati y’itariki ya 19 Ukwakira na 6 Ugushyingo .
Kuri uyu wa kane, umubare munini w’abapolisi n’abasirikare batatanyaga ibihumbi n’abigaragambyaga mu murwa mukuru, Maputo ndetse hanakoreshwa imbaraga za gisirikare kandi zumurengera.
Iyi mibare ije nyuma y’indi yatangajwe n’Ikigo cya Mozambique gishinzwe demokarasi n’uburenganzira bwa muntu cyo cyatangaje ko hapfuye abantu 34 muri rusange.
Ku ya 24 Ukwakira, ishyaka riri ku butegetsi Frelimo riri ku butegetsi kuva igihugu cya Afurika y’Epfo cyigenga muri Porutugali mu myaka 49 ishize, ryatangajwe ko ariryo ryatsinze amatora n’amajwi arenga 70% byanatumye benshi birara mu mihanda .
Aya matora yaranzwemo ibirego by’uburiganya n’iyicwa ry’abashyigikiye abatavuga rumwe n’ubutegetsi, bituma habaho imyigaragambyo mu bice bitandukanye by’igihugu.
Perezida wa Zimbabwe Emmerson Mnangagwa, na we mu myaka ishize warezwe gukora uburiganya mu matora, yashimiye Chapo mbere y’igihe ku bw'”intsinzi ikomeye” ye, na mbere yuko ibyavuye mu matora bitangazwa.
Ossufo Momade, umukandida w’ishyaka RENAMO ryahoze ari umutwe w’inyeshyamba, mbere ryari ryo shyaka rya mbere rikomeye ritavuga rumwe n’ubutegetsi, yaje ku mwanya wa gatatu n’amajwi 6%.
Umusesenguzi kuri politike Tomas Viera Mario yabwiye BBC ko RENAMO yatakaje “umwanya wo mu mateka” wayo kuko Momade, w’imyaka 63, yananiwe kwigarurira abatora b’urubyiruko.
Imibare yatangajwe yatunguye abatora benshi, barimo bamwe mu barwanashyaka n’abashyigikiye ishyaka riri ku butegetsi, by’umwihariko batungurwa no kuba FRELIMO yatsinze ku majwi menshi.
Fernando Mazanga, umuyobozi wungirije w’akanama k’amatora, washyizweho na RENAMO, yavuze ko “ibyatangajwe binyuranyije n’ubutabera bw’ibyavuye mu matora”.
Yagize ati: “Ibi byatangajwe nta ho bihuriye n’ukuri.”
Akanama k’amatora kavuga ko ku bantu barenga miliyoni 17 biyandikishije gutora, abagera kuri 43% ari bo bitabiriye aya matora.
Amatora y’abadepite n’abakuru b’intara na yo yabereye rimwe n’aya matora ya perezida.
FRELIMO yatsindiye imyanya 195 mu myanya 250 y’abagize inteko ishingamategeko. Ishyaka PODEMOS ritavuga rumwe n’ubutegetsi, ryashyigikiye Mondlane nk’umukandida perezida, ryabonye imyanya 31, naho RENAMO ibona imyanya 20.
FRELIMO yanatsinze amatora yose yo ku rwego rw’intara.
Nyuma y’itangazwa ry’ibyavuye mu matora, Perezida Nyusi yishimiye intsinzi ya FRELIMO, mu ijambo ryanyuze kuri televiziyo yagejeje ku gihugu.
Aya matora yabonwaga nk’ashobora kuzana impinduka ikomeye muri iki gihugu gikungahaye ku mabuye y’agaciro no kuri gaze, ariko cyugarijwe n’ibibazo by’ubukungu, ruswa n’ubucyene.