Element ari kubarizwa muri Tanzania gukorana n’abarimo Harmonize
Producer w’Umunyarwanda MUGISHA Robinson fred akaba n’umuhanzi wamenyekanye nka Element Eleeh, ari kubarizwa mu gihugu cy’abaturanyi cya Tanzania mu mushinga wo kurangiza indirimbo yakoreye Harmonize na Marioo bafatwa nk’abakomeye mu muzika wa Tanzania.
Uyu muhanzi yaherukaga muri iki gihugu mu gihe cy’umushinga w’indirimbo SIKOSA, yahuriyemo na Kevin Kade ndetse na Mugisha Benjamin “The Ben” ubu ikaba iri no mu zikunzwe mu Rwanda no hirya no hino muri Africa .
Indirimbo SIKOSA imaze kurebwa n’abarenga miliyoni Enye n’ibihumbi magana ane(4.4M), ndetse iri ku mwanya wa ka biri ku rutonde rw’indirimbo 100 zikunzwe kuruta izindi mu Rwanda “Rwanda Music Billboard” y’ukwezi ku Kwakira2024 rwa DailyBox.
Uyu musore kandi yakunze kumvikana avuga ko atewe ishema no gukora indirimbo z’abahanzi Nya-Afurika, aho ubwo aherutse kuganira n’itangazamakuru yavuze ko mu bubiko bwe hahunitswe indirimbo nyinshi zirimo n’iy’umuhanzi Wizkid ukunzwe na benshi ku mu gabane wa Afurika.
Ku wagatanu w’icyumweru gishize taliki 11 Ukwakira 2024, nibwo uyu musore yageze muri Tanzania aho agiye kurangiza zimwe mundirimbo z’abahanzi batandukanye yari amaze igihe atunganya.
Abinyujije kuri konti ye ya Instagram, umuhanzi Harmonize yavuzeko anejejwe cyane no kongera kugira imikoranire n’uyu mu producer w’Umunyarwanda ariwe Element, dore ko ari nawe wamukoreye indirimbo “one more time” yakoranye na Kenny sol, ndetse na “Zanzibar” yakoranye na Bruce Melodie.
Ni nako kandi umuhanzi Marioo anyuze kuri Instagram ye, yagaragaje amafoto ari kumwe na producer Element Eleeeh muri studio. Aha kandi Element ya hahuriye na producer Zombie wahataniye Grammy Awards, bagaragara bizihiwe.