Uburusiya bwemeje ko ibisasu by’Amerika aribyo biri guterwa n’ingabo za Ukraine muri iki gihugu
Uburusiya bwashinje Ukraine gukoresha roketi zishobora kuba zarakozwe muri Amerika -kugira ngo zibasire ikiraro gikomeye ku ruzi rwa Seym mu karere ka Kursk, gihitana abakorerabushake bagerageza kwimura abaturage.
Ku wa gatanu, ingabo za Ukraine zagabye ikiraro mu karere ka Glushkovsky mu karere ka Kursk ubwo zateraga imbere zinjira mu ifasi mu burengerazuba bw’Uburusiya.
Ku wa gatanu, umuvugizi wa minisiteri y’ububanyi n’amahanga y’Uburusiya, Maria Zakharova yagize ati: “Ku nshuro ya mbere, akarere ka Kursk kibasiwe n’ibisasu bya rutura byakozwe n’iburengerazuba, bishoboka ko ari HIMARS y’Abanyamerika.”
Ati: “Kubera igitero cyagabwe ku kiraro… cyarasenyutse rwose, kandi abakorerabushake bafashaga abaturage b’abasivili babimura bahaburiya ubuzima.”
Ibiro ntaramakuru by’Uburusiya TASS byashyize ahagaragara amazina y’abakorerabushake babiri byavuze ko biciwe muri icyo gitero,abayobozi b’Uburusiya bavuze kandi ko isenywa ry’ikiraro rizabangamira kwimura abaturage muri ako karere.
Ukraine yinjiye muri Kursk ije nyuma y’amezi make Amerika na benshi mu bafatanyabikorwa bayo ba NATO bavuze muri Gicurasi ko bemereye iyi leta ya Kyiv gukoresha intwaro zabo mu gutera ibitero biri mu Burusiya.
Igisirikare cya Ukraine, cyarwanye n’ibitero by’Uburusiya kuva muri Gashyantare 2022, gusa mu minsi ishize nacyo cyagabye igitero cya Kursk mu ntangiriro zuku kwezi.Ku wa kane, Ukraine yavuze ko yigaruriye umujyi wa Sudzha w’Uburusiya, ubarizwamo ihuriro ry’ibikorwa bya gazi bisanzwe mu karere ka Kursk.
Kyiv ivuga ko yigaruriye imidugudu 82 yo mu Burusiya ku buso bwa kilometero kare 1,150 kuva ku ya 6 Kanama.
Abayobozi ba Ukraine bavuze ko iki gihugu kidafite intego yo kwigarurira igihugu cy’Uburusiya. Ku wa kane, umujyanama wa perezida wa Ukraine yavuze ko igitero cya Kursk gishobora gukoreshwa mu kumvisha Federasiyo y’Uburusiya kwinjira mu nzira y’imishyikirano iboneye.