indwara y’ubushita bw’inkende yamaze kugera ku mugabane w’uburayi
Minisiteri y’ubuzima yo muri Suwede yatangaje ko yatahuye umuntu ufite ubu bwoko bukaze kurushaho bw’ubushita bw’inkende muri iki gihugu.
Olivia Wigzell ukuriye ikigo cy’ubuzima cya Sweden yavuze ko uwo muntu wanduye yari yabanje kurwarira mu karere k’umurwa mukuru Stockholm, gusa ko kuba arimo kuvurirwa muri iki gihugu bidateye inkeke ku baturage bose bacyo.
Olivia yabwiye abanyamakuru ati: “Uwo muntu yanduye ubwo yari mu gace kamwe muri Africa aho iyi ndwara ya mpox Clade 1 ari ikiza”.
Uyu ni we muntu wa mbere ubonetseho ubu bwoko bushya bwa mpox hanze ya Africa, yayanduye mu gihe yari muri kimwe mu bihugu bya Africa birimo iyi ndwara iterwa na virus ya Clade 1, nk’uko iki kigo kibivuga.
Muri iki gihe hari amoko atandukanye ya virus ya mpox yateye icya rimwe, ariko atizwa umurindi ahanini n’ubwoko bwa Clade 1b, bukaze kandi bwandura vuba, bwabonetse umwaka ushize muri Nzeri(9) ,hari amoko abiri ya Clade 1 kandi iyabonetse muri Sweden ni Clade 1b.
Nibura abantu 450 bishwe n’iyi ndwara igitangira muri DR Congo mbere y’uko ikwira mu bihugu bitandukanye bya Africa yo hagati n’iburasirazuba,
OMS yizeye ko kuba iherutse gutangaza ubu bushita bw’inkende nk’ikibazo kireba isi bizatuma habaho gufasha uduce tugeramiwe kurusha utundi ,Hari inkingo z’ubu burwayi, ziterwa abantu bageramiwe cyane cyangwa abakoranyeho n’abanduye, ariko inzobere zivuga ko izihari kugeza ubu ari nke.
Nubwo inzego z’ubuvuzi muri Sweden n’i Burayi ziteye imbere, Dr Ferguson avuga ko mpox ishobora gukwirakwirayo vuba vuba kimwe n’ahandi kuko “ubu nta buryo bari barashyizeho bwo guhagarika mpox”.
