Ikipe ya Rayon Sports yitwaye neza nyuma yo kumara imikino itatu yikurikiranya idatsinda
Ikipe ya Rayon Sports yitwaye neza mu mikino y’ikombe cy’Amahoro cya 2025 mu mukino ubanza batsinzemo ikipe ya Rutsiro FC ibitego bibiri kuri kimwe (2-1), mu mukino wabereye kuri sitade Umuganda mu karere ka Rubavu.
Ni umukino wagaragayemo impinduka zitandukanye ku ruhande rw’umutoza Roberto Oliveira Gonçalves do Carmo ‘Robertinho’ dore ko yakoresheje umuzamu Patient NDIKURIYO ndetse na Souleymane DAFFE batari basanzwe.
Iyi kipe yari imaze iminsi kandi ititwara neza dore ko yari imaze imikino itatu idatsinda, nyuma yo gutsindwa na Mukura VS ibitego bibiri kuri kimwe (2-1), inganya na Police FC mu gikombe cy’Intwari ikurwamo kuri penality , mu gihe umukino waherukaga yanganyije na Musanze FC ibitego bibiri kuri bibiri(2-2) muri Shampiyona.
Igitego cya mbere cyatsinzwe na Adama BAGAYOGO ku munota wa 23′ ku mupira yahawe na Fall NGAGNE mu gihe igitego cya kabiri cyatsinzwe na myugariro Youssou DIAGNE ku mupira yahawe na Kevin MUHIRE , uyu myugariro yuzuza igitego cya Gatatu muri uyu mwaka w’imkino.
Ikipe y’Ingabo z’Igihugu “APR FC” nayo yanganyije na Musanze FC ubusa ku busa(0-0), umukino wabereye kuri sitade Ubworoherane i Musanze, umukino wo kwishyura uzabera i Kigali ku wa Gatatu w’icyumweru gitaha.
Mu yindi mikino yabaye, AS Muhanga yatsinzwe na Gasogi United ibitego 2-1, Nyanza FC itsinda Police FC ibitego 2-1, Amagaju FC itsinda Bugesera FC ibitego 2-1 naho City Boys inganya na Gorilla FC igitego 1-1.
IYI NKURU UYAKIRIYE UTE?