DRC yakiriye izindi dose z’inkingo z’indwara y’ubushita bw’inkende
Ministri w’ubuzima muri Repubulika ya demokarasi ya Kongo yatangaje ko icyo gihugu kigiye kwakira inkingo z’indwara y’ubushita bw’inkende.
Repubulika ya demukarasi ya Kongo itegereje inkingo za mbere z’indwara y’ubushita bw’inkende kuri uyu wa kane, icyiciro cya kabiri cyazo kikazahagera kuwa gatandatu w’iki cyumweru. Byatangajwe n’umukuru w’itsinda rishinzwe kurwanya iyo ndwara, Cris Kacita.
Ishami ry’umuryango w’Abibumbye ryita ku buzima OMS, mu kwezi gushize ryatangaje ko iyi ndwara yatangiriye muri Repubulika ya demokarasi ya Kongo ari icyorezo gihangayikishije isi. Gusa uburyo bwo kuyikumira bwahuye n’imbogamizi zishingiye ku ibura ry’inkingo.
Umukuru w’itsinda rishinzwe kurwanya iyo ndwara ntiyatangaje ingano y’inkingo Repubulika ya demukarasi ya Kongo iteganya kwakira kuri iyo minsi yombi.
Kuva iyi ndwara yadutse muri Kongo abagera ku 19,710 bamaze kuyandura, nk’uko bitangazwa na ministeri y’ubuzima muri icyo gihugu.
Mu butumwa bwa videwo ministri w’ubuzima wa Kongo, Roger Kamba, yatangaje yavuze ko bagiye kwibanda ku gutera imiti yica udukoko mu mashuli no gushishikariza abana gukaraba intoki cyane cyane muri iki gihe amashuri agiye gutangira.
Kuri uyu wa 15 Kanama 2024, Umuryango Mpuzamahanga ushinzwe ubuzima, OMS, washyize iki cyorezo mu byugarije Isi, usaba ubufatanye ku rwego mpuzamahanga mu gukumira ikwirakwira ryacyo riri ku muvuduko uteye impungenge.
Umuyobozi Mukuru wa OMS, Dr. Tedros Adhanom Ghebreyesus, yagize ati “Ingamba zihuriweho ku rwego mpuzamahanga ni ingenzi mu guhagarika iki cyorezo no gukiza ubuzima.”
Ikigo nyafurika gishinzwe kurwanya no gukumira indwara, Africa CDC, cyatangaje ko iki cyorezo kimaze kugera mu bihugu 13 bya Afurika birimo ibyo mu karere nka RDC, u Rwanda, Uganda, u Burundi na Kenya.
Tariki ya 27 Nyakanga 2024, ikigo cy’u Rwanda gishinzwe ubuzima, RBC, cyatangaje ko muri iki gihugu hagaragaye babiri banduye iki cyorezo, gisobanura ko bari ubwandu babukuye muri RDC kuko bari baherutseyo.
Umuyobozi ushinzwe kurwanya ibyorezo muri RBC, Dr. Edson Rwagasore, yagize ati “Abarwayi bose twasanze barakunze kugirira ingendo muri Repubulika Iharanira Demokarasi ya Congo. Indwara y’Ubushita bw’Inkende imaze iminsi igaragara mu bihugu bitandukanye.“
Tariki ya 7 Kanama 2024, Umuvugizi wa Minisiteri y’Ubuzima, Julien Mahoro Niyingabira, yatangarije IGIHE ko umwe mu banduye iki cyorezo yakize, undi akaba yari acyitabwaho n’abaganga.
Iyi ndwara yandura binyuze mu gukora ku muntu uyirwaye cyangwa ku matembabuzi y’uyirwaye, mu mibonano mpuzabitsinda cyangwa gusomana.
Ibimenyetso byayo birimo ibiheri biryaryata bikunze gufata imyanya ndangagitsina, mu maso, mu biganza no ku maguru, kugira umuriro, kubabara umutwe, kuribwa mu ngingo no kugira amasazi.
Uburyo buyirinda burimo kwirinda gukorana imibonano mpuzabitsina n’ufite ibi bimenyetso no kugira umuco wo gusukura intoki hakoreshejwe amazi meza n’isabune.
Dr. Tedros yatangaje ko OMS yafashe icyemezo cyo gushora miliyoni 15 z’amadolari ya Amerika muri gahunda yo gukumira iki cyorezo, miliyoni 1,45 y’amadolari ikaba ari yo yamaze gusohoka.