CAF yongeye gushimangira ubushongore bwa sitade amahoro
Impuzamashyirahamwe y’Umupira w’amaguru muri Afurika, CAF yashyize hanze urutonde rwa za Sitade zishobora gukinirwaho imikino mpuzamahanga y’iyi Mpuzamashyirahamwe, aho u Rwanda rwisanze rufite ebyiri, ibintu byaherukaga mu myaka ine ishize.
CAF yashyize Stade Amahoro na Kigali Pelé ku rutonde rw’ama-Stades yemerewe kwakira imikino y’ijonjora rya mbere n’irya kabiri, mu marushanwa nyafurika ahuza amakipe yabaye aya mbere n’ayatwaye ibikombe iwayo ariyo CAF Champions League na Confederation Cup.
Mu Rwanda, ikipe ya APR FC niyo izakina CAF Champions League ikazahura na Azam yo muri Tanzania, mu gihe Police FC ariyo izahagararira u Rwanda muri CAF Confederation Cup ikaba yaratomboye ikipe ya CS Constantine yo mu Barabu muri Algeria.
Uru rutonde rwagiye hanze ku gicamunsi cyo kuri uyu wa Gatanu tariki 12 Nyakanga 2024, ruriho n’Ibihugu bidafite sitade n’imwe ishobora kwakira iyi mikino, aho nko mu karere harimo u Burundi, Kenya ndetse na Sudani y’Epfo.
Ni mu gihe u Rwanda, Uganda, Tanzania na Repubulika Iharanira Demokarasi ya Congo, byombi bihuriye mu Muryango wa Afurika y’Iburasirazuba, buri kimwe gifitemo sitade ebyiri.
Igihugu gifite sitade nyinshi kuri uru rutonde rwa CAF, ni Afurika y’Epfo, ifiteho sitade cumi n’imwe, naho Morocco na Algeria, na zo buri imwe kikagira zirindwi.
Biteganijwe ko iyi mikino izaba hagati ya tariki 16 Kanama kugeza ku ya 22 Nzeri. U Rwanda ruzaba ruhagarariwe na APR FC yatwaye ikombe cya Shampiona ya 2023-2024 na Police FC yatwaye igikombe cy’Amahoro.
Kuva muri 2020, ni ubwa mbere u Rwanda rugize Sitade zirenze imwe zakwakira imikino mpuzamahanga ku rwego rw’amakipe asanzwe (Club) ndetse no ku rwego rw’amakipe y’Ibihugu.
