Byamenyekanye niba Lamine Yamal ari bukine umukino wa Barcelona muri Champions League
Mu mukino w’umunsi wa Gatanu wa UEFA Champions League 2024-2025 ikipe ya FC Barcelona iraza kwakira ikipe ya Brest yo mu gihugu cy’Ubufaransa idafite kizigenza wa yo Lamine Yamal nk’uko byamaze kwemezwa.
Nyuma yo gusiba imikino ibiri iheruka ya Shampiyona y’igihugu ya Esipanye “La Liga” yose Barcelona itabonyeho amanota atatu imbumbe aho batsinzwe na Real Sociedad igitego kimwe ku busa(1-0) ndetse n’umukino banganyije by’amaherere ibitego bibiri kuri bibiri(2-2) n’uyu agiye kuwusiba .
Ikipe ya Barcelona muri Champions League ntago biraba bibi kubera ko mu mikino ine iheruka imaze gutakazamo umukino umwe wo nyine , ikaba ifite amanota 9 kuri 12 imaze gukinira, ikaza ku mwanya wa 7 mu makipe 36 agize Champions League ivuguruye.
Lamine Yamal ni umwe mu bakinnyi bafatiye runini iyi kipe dore ko imikino myinshi Barcelona yakinnye itamufite cyangwa atabanjemo byagiye bigorana, kuri ubu amaze gutsinda ibitego 5 anatanga imipira 7 yavuyemo ibitego(Asstist) muri Shampiyona , muri Champions League amaze kugira uruhare rw’ibitego 2 mu mikino 4, atsinda igitego 1 atanga n’umupira 1 wavuyemo igitego.
Usibye uyu Munya-Esipanye Lamine Yamal , Barcelona iraza kandi gukina na Brest idafite Eric García, Marc-André ter Stegen, Ansu Fati, Marc Bernal, Andreas Christensen, Ronald Araújo, ndetse na Ferran Torres.
Iyi Brest iri bwakirwe na Barcelona kuri Estadi Olímpic Lluís Companys imikino 2 iheruka barayitakaje muri shampiyona aho batsinzwe na AS Monaco bitatu kuri bibiri(3-2) ndetse batakaza imbere ya Montpellier ku bitego bitatu kuri kimwe(3-1).